Lai Cah Lai

Hi vawlei cung, miphun cawhnak

Na tum hnga maw, miphun dang rim

Na zonh sual maw, an aan perhle

I ruat tthan hmanh, Lai cah cun Lai

An ttha bik ko, vawlei cung ah

Aa dawh bik ko, an semthlairem

Lai cah cun Lai, zeitin na ruah?

Miphun dang maw, zonh sual lai ci

Na sining thlum, Lai cah si seh

            Phantu: Aa Sang

Ttawhngan Senri

Thinpar sang, vazun dingdi

Phak khawh lo, ttawhngan senri

Khi bang in, liam ai kun law

Chun ni ceu, khua hmuh tertu

Liam lai caan, sian lo nikaa

Khi bang in, liam ko kun law

Zoh aa dawh, hlingngei pangpar

A ttialcia, senri parttha

Kal tak in, liam ai kun ko

      By..... Aa Sang

Lai Pate (2)

Rianttuan zuam lo, ei lawng bawh
Tangka ngeih lo, nungak chawnh tthawn ngai

Inn man thawh awk ngei lo, leiba cawn
A leiba cawnmi, 30/100 deng palik tthenh pah

Rian na ttuan lo tiah, rian a um lo ti
Rian um cang tiah, ka zuam deuh rih lo ti

A sung khun anih cah cun, tangka $50 ngeih khi
Mah khin cu, mirumpi bang, a bia-u a cang

Leiba voi zeit a ngeih, a lung nih philh diam
Nungak phone chawnhnak, ruah ah cun

A hawile nih, ka kawi
Rianttuan cang, na leiba a tam tuk hih van ti le cangka

Chim hlah uh, ka ttuan zuam rih lo i si
Laipa pei ka si cu, ka cham khawh ko lai ai ai ai hei ti

I ruat tthan rih hmanh, laipa laipa ti a au pengmi pa
Na laimi sidan naa palh rua hih, pingpalo na sawh cang hih






By...... Aa Sang

Lai Pate

Nikhat hun chuak, zei kong ruah lo
Zei tin ka vah lai, ti kong lawng ruat

A tawhrolh cu, nu bang tawite hruk awk ttha ttung lo
A tawhrolh cu, aa tholh i a kut in aa tlaih

A kal sia rem lo tuk nain
Style pakhat cu thiam ve cang kaw

A tawhrolh hrut, minak a hluan
A umtu ningcang, mirang hrut chupchap bang

Nungak a tuai, a lung vuai tiang
Tampi nih a phi an pek, aa lung hmuh ngai

Nain, va ca tiang an rak ham lo kha
Anih nih aa hngal ttung lo, a leng vuan lawng

Laipa ka si, ti i hngalsak ngai
A hman deuhmi le, mirang ca mirang holh

A thiammi zoh ah, pakpalawng
Tawhrolh tholh le, nungak tuai

Lai pate, fak deuh in khua ruat cang
Laimi na sinak naa palh khah.




By....... Aa Sang

Lai Nute

Nikhat hun chuak, zei kong ruah lo

Dawhnak kong lawng, thluak chung um

Tawhrolh tawite, mirang nu a hluan

Mi duhnak tuah thiam, kawl nu a hluan

A hmai aa thawh, ttamhnak hna nih

Aa dawhnak, chilh dih diam hna

Pa pawl zohnak, mit tha damnak

lang dengmang, thilthuam i hruk in

Dawtu a kawl, hi vawlei ah

Dawtu tampi a tong, zungzal ca si lo

Duhtu tampi a tong, chikhat cu

Zungzal cah si lo, hlawt tthan ding men

By... Aa Sang

A Tu Cun

Na anka thlum ka thinlung ah
Na mithmai panh ka mithlam ah
An caam zungzal ni tin in
Philh caan um lo-in

Hnulei kir timh zawn ah
Hlamnak thinlung a zual
Philh in hlawt zalh zawn ah
Ngaihnak an zual

Tthennak bia an phai zawn ah
Dawtnak a karh
Philh ni um lo kei thinlung ah 
A tu cun zungzal caah
Kaan thim


By.. Aa Sang

Nangmah Tthiam

Dai tein ummi, ka thinlung

A hliphlau-tertu nang

Aa hngilh liomi ka thinlung

Panh tein a umter-tu nang

Zoh awk tlak lo ka thinlung

Dawh tein a chiatu nang

Thinlung inn khar, tawhhrenhmi

A hungtu nang

Dawtnak thawtnam, a ka tehter-tu nang

Dawtnak nuamh ning, a ka chimtu nang

Duh thiam lakin, a ka tuahtu nang

Thinlung mit a  hauter-tu, nang

Ka thinlung, a muichiat tertu nang

Ka dumdawh a khaangtu nang

Ka dawtnak a hlonhtu nang

Ka thinlung tawh a khiaktu nang tthiam

      By... Aa Sang

Nawl Hmanh Ninglaw

Zan khuamawt tlingkhan dang cung in

Ka dawt, nawl len lang-ning

Nawl len hmanh ah, leh rulh um rih lo

Tho tuan in kan um khua chung velning law

Zatlang lam le nuamhnak hmunn hma ah khin

Kawl ning law, ka tum farhniang ka hmu ttung lo

Kaan siang lo tin, au len hmanh ning

Kir tim ti ai lo, kei sinah

Valdang sin uai cangmi, ka dawt nunnem

                                                                          By......... Aa Sang

Nika Le Thlapa

Nika le thlapa

Anmah te lawng vanlai ah

Kawp ngei lo in, an rung vang

Thlapa Liam ah nika chuak

Nika liam ah thlapa vang

Kawmh khawh lo, nika le thlapa

Cabang, ka dawt

nang le kei, kan si vekvek cu

Ttian kun u-sih, lungtling tein

        By... Aa Sang

Na Caah

Fur caan ah, ruah an phengtu

Nithawng sining, na himnak dingah

Tthal caan ah, nilin an phengtu

Thladem sining, na daihnak dingah

Khuasik caan ah, khuasih pengtu

Angki lum sining, na khua lumnak dingah

Na cah, nika pakhat bang

Ceunak peitu, si ve ning mu

       By.... Aa Sang

Rak Ka Ngaithiam

Dawtmi, duhmi nang le kei kar

Ruahchannak awk ka ngei ti lo

Lungkuainak lawng maw 

Kei val co tawk a si

Zan mang tiang kaan hlam nain

Nang nih zei na hngal ttung lo

Nikhat hmuh lo kaan ngai nain 

Nang nih huatnak ah na hman

Nangmah lawng kei duhmi

Nangmah lawng kei thinhnemtu

Nang hngal lo kei val hi

Nang zuun ngai in caan ka hmang tawn

Kaan dawtnak hi hngalthiam loin

Huatnak he na caan na hman cang

An dawtu ka cah lungfahnak le 

Ngaihchiatnak a si

Duh, dawt ti cu huat si ttung lo

Duhdawt loin rak ka hua hram hlah

Ka ngaithiam nang an dawtu hi

Lung fak in rak um ti hlah

Rak ka ngaithiam

By.... Aa Sang

Ka Dawt

Ka dawt, kaan ngai ruangmang

Lennak dan in ee, nang zuun ngai in

Riaklang va bang, keimah lawng

Thlapa tang ah, ka rung vai tawn

Ka dawt, kaan hlam ruangmang

Nang kei bang, na ka hlam ve tawn maw?

Tthentu um hlah seh, tin kan rak tiambia

Ka ngai ee, hlan kan caanttha

Ka dawt, nang he zungzal

Tthen ding cu, ka ruat kho lo

Lennak dang hmanh seh, ton tthan hlan tiang

Val dang sin cun, lung ngei hlah mu

Ka dawt, hmuh lo caan sau hmanh seh

Kaan hlam zungzal, ka dawt bikmi

Lennak dang hmanhseh, ka thinlung

Nang cah, zungzal in ka chiah ko

              By..... Aa Sang

Pupa Nun

Ho uknak um lo, Pupa hna ram
Eentainak um lo, Lairam nuam
Biachia um lo, maw ram nuam

Tlawmngeih nun, ngei hna e
Zawnruah nun, cinken peng hna e
Dawtnak nun, rak i nunpi hna e

Mah zawn lawng ruah lo, dawtnak thinlung he
Bia ring bia ral ngei lo, inn khat hmanh tang hlah e
Miphun dawtnak lo, nungmi um hna hlah e

Biaduh um hna hlah, saanglai kai ttih ah e
Chim duh hmanh ah, ka chim van kil rang kai seh e
Ti hnu lawng ah, chim tawn hna e

Zoh aa dawh ee, chantarmi caah
Duh nung khun ee, tefa caah
Nunpi awk tlak ee, pupa hna nunnak

Ka Phun Lo

Duhmi, Dawtmi
Nang he lentti lio caanah, zungzal hmun ding
Bia kan tiam, lung tling tein
An liam tuan ee, minmei zaam bang
Kei phu tawk lo, na dawtnak biakam

Santlai lo kei he, zungzal
Lengtti ding in naa nawl har tuk rua
Miphun sang leengnu, liam ko law
Kei vaal sin in, ka phu lo ee
Nang he zungzal lengtti ding ah

Na liam lai ah, bia in cah lang
Kaan duh, kaan dawt, kaan ham
Bawngva dawh te aw
Hmanh seh, liam ko law
Na dawtnak hri, cah hnu cun
Nang he co dingah, kei ka phu lo




                                                          By........ Aa Sang

Ka Phu Hnga Maw?

Lung thli ka tum, na len hawi lakah
Cuang khun ai ee, kei vaal caah
Ka lung kil in kaa uam, kei dawtnak
Phuang ning ka ti, ka phu hnga maw?

Iangtu um lo, kei mit chung ah
Ka zoh cim lo, na mit dawh te
Kei cah si ve seh, ka ti zawn ah
Ka phu hnga maw? 

Tampi na ton, an dawtu ding ah
Kei nak mui dawh, si kho si ai hna
Khuang cawi lio, ar pakhat i cuh 
Hme, ngan thlei dang lo bang
Na dawtnak co ve ding in
I zuam ning law, ka phu si hnga maw?


                           By... Aa Sang

Nang

Lung dong in, hnabei dongh caan ah
Ruahchannak ngeih lo caan ah
Ka ruahchannak thar, nang na si

Kei lawng umkhuar har in 
Ka um lio caan ah, ka thluak nih
Khua a ruah tikah, nangmah kong

Bia dawh tukmi, ka thinlung chung hung chuah tikah
Nang na min, ka kaa in hung chuak theo tawn
Hi vawlei, muihnak lakah
Lamhruaitu mei-inn, ka zeizong te
Nang na si




              By... Aa Sang

A Baumi Nunnak

Kaan ngai tuk ee, Dawtmi 
Kei sin in, liam na ser lio ah khan
Kei cah rak ruat ve law, na liam hnga lo mu

Kei cah ruat ti lo-in, lam dang na pial hnu
Ka thinlung ah, na um ti lo hnu cun
Ka nunnak bau ai ee, dawtmi

Kei cah, thinlung kil thli in
Hngalhthiampiak i, a baumi nunnak
Rak tlingter tthan um hnga maw?






                          By... Aa Sang

Lai Vaalttha Rual

Semnak Lairam chuah takin
Van hram deng Malay ram ah
Thin phang bu in, thlan hriput he
Ttuan hawl hna maw, chungkhar cah ruah ah
Sal si ttung lo, sal bang ttuan ee


Semnak Lairam, chungkhar tling in
Sunghno nu chuan rawl dumtti lio caan
Hawikom rual he nuam in lentti lio caan
Ngai tuk hna lai, zuuntthing khirh zawnah


Hringtu kan nu Lairam cah tin
Harnak lakah, pa can cuh in
Ttuan hawl hna maw, Lai vaalttha rual


                                                   By........ Aa Sang

A Cu Cang Lo Maw?

Mah ram si lo, mi ram ah

Mah hngal lo-in

Zalam tlum lo tiang, rithai ser hna

Cakei kaa pur lai bang

Buai tawn hna maw

Zalam thluan ah

Ram vengtu si lo

Mah ven hau ai cang

Mi bawmtu si lo

Mah bawmh hau ai cang

Kan nu Lairam cah

Mintthatnak phurtu si lo

Minchiat-tertu ah cang ai hna mu

Ka fa ngan lai ka ti, um phul cawk bang

Fak khun ai lai

Sunghno nu Lairam caah

Laihri tlai hawikom dawt

Lungfim caan a cu cang lo maw?

                    By...... Aa Sang

Na Duh Hnga Maw?

Dawtmi
Kei hi pangpar rimhmui thaw lo bik khi hei si ninglaw
Nang a zuang liomi palep dawh bik khi he si law
Na ka tlan duh ve hnga maw?

Kei hi thlam chia pakhat khi he si ninglaw
Nang hi dawrnak a kawl liomi khi he si law
Ka thladem tang ah naa dawr duh ve hnga maw?

Zungzal ca in
Kaan duh, kaan dawt, kaan ham
Tin, ka thinlung hi nang cah chia ninglaw
Na lut duh ve hnga maw?


                                       By... Aa Sang

Na Min

Dawtmi, na min cu
Ka ca-uk chung ah ka ttial nain
Ti nih a cinh i a tlek dih sual
Ka kut ah ka ttial nain
A piat tthan ai ee
Rili kam ah ka ttial nain
Tilet nih a kalpi dih cang ai

Hmanhseh, zungzal hmunhma
Ka thinlung chung ah ka ttial i
Cinh tu um lo, phiattu um lo, fenhtu um lo
Zungzal a hmun ka thinlung chung ah

Dawtmi, na min

By... Aa Sang

Na Ka Sianh Ve Hnga Maw?

Dawtmi

Nang hi pangpar dawh bik hei si law

Kei hi a tizu kawl liomi khuaivah khi hei si ninglaw

Na tizu tlanh ve ding ah

Na ka sianh ve hnga maw?

Nang hi dawrnak ttha bik inn nganpi hei si law

Kei hi dawrnak ngei lo, dawrnak a kawlmi hei si ninglaw

Kei dawrnak caah na thladem hi

Na ka sianh ve hnga maw?

Innkaa hunhtu ngei lo kei hi

Na thinlung innkaa

Rak kingh ve ding ah

Na ka sianh ve hnga maw?

 

By......... Aa Sang

Zungzal Carhtiput

Ka chuahsemkaa in a tu tiang

A ka zohkhenhtu Pathian

Nang kal tak in, zungzal carhti ka kawl

Hi leicung khuaza ramkip, carhti ka kawlmi cu

Ka hmuh cang ka ti tikah an nih an lo tuan ee

Khuasik caan lawng i a chuakmi carhtiput

Ttha caan i a chuak kho ti lomi carhtiput bang

An nih ka hmuhmi, carhti hna cu si ai ee

Lawmhnak um kho lo, Pathian lo in cun

Nuamhnak tling um lo, Nang na bau cun

Ka saduhthah tling kho lo, kaan kal tak hnu cun

Kaa fiang ka Bawipa, ngaihchiah in

Nang sin ka ra, ka sual ka thianhpiak tthan law

Zungzal na fa ah run ka hmang ve hram ko

Zungzal carhtiput Bawipa sin lawng ah a um

                           By............... Aa Sang

Velhle Leengnu

Kum caan tampi liam in, dawtnak biahri kan rak hren

Zungzal hmun seh tin, lungtling tein kan rak tiam

Dongti lo-in, dawtnak cerhtiput luang seh kan rak ti nain

Na lung aa her a tuan tuk ee, Kei lawng chiah takin

Zei ti awk ttha, an-hleng leengnu

Kei phu tawk lo, na dawtnak bia

Ka rak i zumh sual, kaa in chuakmi dawtnak bia

Kaan dawt tuk ka far tin

Ka ttang cung kaan pom lio ah

Kaan dawt ko ee ka tta na rak ti

Tthen kaan siang lo, kei kiang ah zungzal in um law

Liamser hin hlah, leeng dang hawi sinah na ti nain

Caan tawi te caan lawng, ka dawt leeng nu

Ka thinhnemtu ding si lo, ka thinlung dumdawh hrawktu

Sivai phun khat, na rak i ai mu ka dawt

Kaan zumh sual, velhle leengnu

                 By.......... Aa Sang

Laimi Na Si Peng Ko

     CHIN STATE Map

Na chuahnak Lairam cu kaltak in

Hngalh lonak miphun dang ah zam in

Umlen hmanh law, 

Laimi na si

Lai ca, Lai holh thlau duh in

Miphun dang holh in holh hmanhlaw

Laimi na si

Lai nunphung philh in

Miphun dang nunphung in nung hmanhlaw

Laimi na si

Na taksa i thleng in

Mirang vun i ngeih hmanhlaw

Na thisa, na chuahkehnak in

Laimi na si

Laimi hawi ngeih duh loin

Miphun dang he va tlongleng ko hmanhlaw

Laimi na si peng ko

Langak bang awtaw nun cawn cu i tim ti hlah

Miphung dang hawi he i um hmanhlaw

Na miphun sinnak na thih tiang a tlau lai lo

Laimi na si peng ko


By.......... Aa Sang

Kaan Ngaih Zawn-ah

Ka Dawt, lennak tlang aa dang cang

Ton lo-in hmuh lo caan zong nih a hung sau cang

Kaan ngaihnak a zual, leeng le vaal hmuh zawn ah

Nang he nuam in rak len lio caan, kei mitthlam ah an cuang

Lennak dang in, ton lo caan sau cang ko hmanh seh

Ka thinlung nih, an philh sual lo dawtmi

Hawi bia-nuam tlorh lio caan ah

Kei lawng tthu in, nang kong ka ruah caan a tam ko cang

Hawi sin lente celh zuam lo-in

Kaan ngaih zawn ah, lungkil mitthli a tla tawn

Nang le kei, caan khatkhat ah ton tthan caan um lai tin

Kaa ruahchannak hi tling hram ko sehlaw

Zalong tein nang kong, ruahnak caan 

Ka ngeihmi caan te khi a sunglawi khun ko

Ho dawnkhan-tu um lo, nang kong ruah caan te khi

Kaa nuamh bik caan, kaan ngaih zawn caan

Ruahchannak nganbik he, nang cah tin

Ka thinlung ka chiah peng ko, dawtmi

Nang kaan ngaih zawnah, ka lungkil in

A chuakmi bia

                           By........ Aa Sang