Velhle Leengnu

Kum caan tampi liam in, dawtnak biahri kan rak hren

Zungzal hmun seh tin, lungtling tein kan rak tiam

Dongti lo-in, dawtnak cerhtiput luang seh kan rak ti nain

Na lung aa her a tuan tuk ee, Kei lawng chiah takin

Zei ti awk ttha, an-hleng leengnu

Kei phu tawk lo, na dawtnak bia

Ka rak i zumh sual, kaa in chuakmi dawtnak bia

Kaan dawt tuk ka far tin

Ka ttang cung kaan pom lio ah

Kaan dawt ko ee ka tta na rak ti

Tthen kaan siang lo, kei kiang ah zungzal in um law

Liamser hin hlah, leeng dang hawi sinah na ti nain

Caan tawi te caan lawng, ka dawt leeng nu

Ka thinhnemtu ding si lo, ka thinlung dumdawh hrawktu

Sivai phun khat, na rak i ai mu ka dawt

Kaan zumh sual, velhle leengnu

                 By.......... Aa Sang

Laimi Na Si Peng Ko

     CHIN STATE Map

Na chuahnak Lairam cu kaltak in

Hngalh lonak miphun dang ah zam in

Umlen hmanh law, 

Laimi na si

Lai ca, Lai holh thlau duh in

Miphun dang holh in holh hmanhlaw

Laimi na si

Lai nunphung philh in

Miphun dang nunphung in nung hmanhlaw

Laimi na si

Na taksa i thleng in

Mirang vun i ngeih hmanhlaw

Na thisa, na chuahkehnak in

Laimi na si

Laimi hawi ngeih duh loin

Miphun dang he va tlongleng ko hmanhlaw

Laimi na si peng ko

Langak bang awtaw nun cawn cu i tim ti hlah

Miphung dang hawi he i um hmanhlaw

Na miphun sinnak na thih tiang a tlau lai lo

Laimi na si peng ko


By.......... Aa Sang

Kaan Ngaih Zawn-ah

Ka Dawt, lennak tlang aa dang cang

Ton lo-in hmuh lo caan zong nih a hung sau cang

Kaan ngaihnak a zual, leeng le vaal hmuh zawn ah

Nang he nuam in rak len lio caan, kei mitthlam ah an cuang

Lennak dang in, ton lo caan sau cang ko hmanh seh

Ka thinlung nih, an philh sual lo dawtmi

Hawi bia-nuam tlorh lio caan ah

Kei lawng tthu in, nang kong ka ruah caan a tam ko cang

Hawi sin lente celh zuam lo-in

Kaan ngaih zawn ah, lungkil mitthli a tla tawn

Nang le kei, caan khatkhat ah ton tthan caan um lai tin

Kaa ruahchannak hi tling hram ko sehlaw

Zalong tein nang kong, ruahnak caan 

Ka ngeihmi caan te khi a sunglawi khun ko

Ho dawnkhan-tu um lo, nang kong ruah caan te khi

Kaa nuamh bik caan, kaan ngaih zawn caan

Ruahchannak nganbik he, nang cah tin

Ka thinlung ka chiah peng ko, dawtmi

Nang kaan ngaih zawnah, ka lungkil in

A chuakmi bia

                           By........ Aa Sang

Zuun Ngaih Caan

           Kum caan  an liam cang, ni-thla hna nih

          Tlaih khawh lo in, caan sin ah liam cang hna

          Nang he tthennak caan nih hung sau cang

          Ngaihnak a zual, zaan thlapa zoh ah

          Lung a leng, vate aw dawh theih ah

          Tthen caan sau hmanh seh, ka thinlung nih

          An philh khawh ttung lo, nang lawng an hlam

          Len hawi sinah, nang muithlam a leng ti lo

  Kaan kawl theo, kan len tawnnak zalamthluan ah

       Na um ttung lo kan lentti-nak zalamtlang ah 

          Ni maw a sau khun hnga, caan dah a dir hnga

          Ka dawt, nang le kei tthen caan sau tuk cang ai

          Caan nih hawi hngah lo in, liam tuan sehlaw

          Nang le kei ton lai nakah, zuun ngaih caan ah

          Lung-kil thil in a chuakmi bia


                                              By......... Aa Sang

Dawtnak

An chim duhnak, mit ah a um

An phai dawtnak, thinlung chung ah

An chim duhnak, mui ah um

An phai dawtnak, thinlung chung ah

An chim ka theih theo tawn

Duhnak umnak hmun ah, remnak tling um lo

Duhnak nih hmunhma a khurnak hmun ah

Caan sau nguh lo, an ziam tawn ee dawtnak

An phai ka theih theo tawn

Dawtnak umnak hmun ah, nuamhnak tling a um

Dawtnak nih hmunhma a khurnak hmun ah

Dong ti lo in, dawtnak carh-tiput a luang

Cu bang ka dawt,

Nang le kei kar duhdawtnak ah

Duhnak biapi ah ruah lo in, dawtnak tu hmai ah chia in

Zungzal leng tting ko seh, hi vawlei cung ah hin

 

      

                                  By........... Aa Sang

Hlingngei Par Dawtnak

  Hlingngei par khi, ka dawt rak zoh tthan hmanh

  Iangtu um hnga maw, par dang hna nih

  Cuang khun ko maw, par vialte lakah

  Duh khun ai hna, leeng rua nih

  Tlaihchan khun hna, par dang nakin

  Aa dawh tukmi, hlingngei par

  Hlingngei par kong khi na ruat bal maw

  A cuang khunmi, ttha tein na zoh bal maw

  An duh bikmi par, a sining na ruat bal maw

  

  I dawh in, mi mit cu laa ko hmanhseh

  Aa dawhnak nih, mi fahnak a pek

  A par lawng zoh in, a hling hmuh sual lo ah cun

  Mi taksa fak ngai in, tuar awk a pek

  Cung bang ka dawt, kaan cuanh, kaan zohthla

  Leeng vial nakin, ka thim hleimi na si

  Hmanhseh, na lenglei lawng ka rak in zoh sual rua

  Na thinlung zoh sual lo in  

  Hlingngei par bang, ka thinlung

  Fahnak petu, iang ngei kun par dawh

  Harnak petu, chungthu lengnaal

  Na si hnu cun, nang zuun tuar lawng maw

  Kei ka chuahchan, a si kun hnga

  Hlingngei par, velhle thiam


 By..... Aa Sang

  

Kaa Lawm Ka Nu

Thla kua chung, bawchung in pawi i

Nganfah bu in a ka hringtu ka nu

Fale ruah ah eidin naa sum

Kum 2 tiang a  hnukthlum a ka dinhtu ka nu

Fale ruat in thazaang thar naa lak tawn kha

Ruahti hrial lo, khuasik, nilin hrial lo

Fale cah ruah ah, thlanti he

Tangka kawl ee, sunghno ka nu

Fale hawihngar lai ruah ah, ei naa sum tawn

Fale fimthiamnak cawnnak caah, dinh ni um lo

Fale hmailei caan ah, mi hmai ah lang kho ve ding in

Zanttim tiang, khua na ruat tawn, sunghno ka nu

Na dawtnak mei ceu, fale lamhruaitu ttha

Na kan dawtnak fale cah a sung khun ko

Kaa lawm, ka nu

Hi leicung ah nganfah bu in na ka hrin cah

Kum 2 tiang na hnukthlum tu 

Pathian nih in cham hram seh

Kum caan saupi kan nu pi in

Kan biak Pathian sinah thluachuak kan halpiak hram rih

Zungzal in, Pathian nih thluachuah in pe ko seh.....

KA NU

 By....... Aa Sang

Hawi Ttha Zisuh

Umkhuahar in, kei ka len lio ah

Ka cah thazaang petu, Hawittha Zisuh

Lungdongh in, ka um lio ah

Ruahchannak petu, Hawittha Zisuh

Hnabei dong in, khua ka ruah lio ah

Kei cah, lam hmuh saktu, Hawittha Zisuh

Thil ttha lo, ka tuah caan ah

Lamding chim tu, Hawittha Zisuh

Sualnak chung, ka luh lio ah

A ka chuah pitu, Hawittha Zisuh

Harnak ka si phan hmanh seh

Zeihmanh ka ttih ti lo

Ka zeizong ngeitu, Hawittha Zisuh

Kei sin a um hnu cun...


By.... Aa Sang 

Kal takmi Kei

Kaan dawt peng ko, na ti kun

Kaan ngai tuk, na ti kun

Kan tiam duhdawtnak, zungzal hmun seh na ti kun

A roh hlan ah, nang na liam kun

Kaan philh kho lo, kei nih cun

Ka thinlung chung ah, nang lawng na caam

Kaan ngaih zawnah, ka mitthli in ka hmai kaa phiat caan tam

Duhnak thinlung ngei kho ding in

Na rak ka cawnpiak kha

Rak kir tthan in, philh khawhnak thinlung

Tuarthiamnak rak ka chim tthan law

Kal taktu ka si lo, kal tak mitu ka si

Tan takmi kei lawng maw, ka uai rih lai

Ka lung kuaitertu, nang

Na umhar pheng lawng maw, ka rak si kun

Dawtmi, "a fak", ka ti

Lung i mer in, lam dang na pial hnu cun




                         By......... Aa Sang